३१ औं जिल्ला जुनियर रेडक्रस गोष्ठी सम्पन्न

बज्रवाराही । रेडक्रस सोसाइटी मकवानपुरको ३१ औं जिल्ला जुनियर युवा गोष्ठी सम्पन्न भएको छ । उत्तरी मकवानपुरको सुनौला माविमा संचालित गोष्ठीमा जिल्ला भरका ४२ वटा विद्यालयहरुको सहभागिता रहेको थियो । गोष्ठीको उद्घाटन प्रमुख अतिथी स्थानीय विकास अधिकारी भुवन प्रकाश विष्टले गर्नु भयो । उद्घाटन कार्यक्रममा बोल्दै विष्टले सेवा नै धर्म हो भन्दै आफ्नो तर्फबाट आवश्यक सहयोग गर्न तत्पर रहेको वताउनु भयो । पर्यटन नगरी टिस्टुङ पालुङलाई पर्यटन प्रवद्र्धन र पर्यटक विकासका लागि जिल्ला स्तरीय कार्यक्रमहरु संचालन गर्ने वताउँदै उहाँले होमस्टे कार्यक्रमलाई प्रभावकारी बनाउनु पर्ने तर्फ पनि जोड दिनु भयो । 

अतिथीहरु लाई सम्मान गर्दै 

कार्यक्रमको पहिलो दिन विद्यार्थी, अभिभावक, विभिन्न संघसस्थाका प्रतिनिधि लगायतले सुनौला माबि  देखि पापुङ  हुँदै  लिलाखेलसम्म प्रभातफेरी गर्दै चेतनामुलक सन्देश प्रवाह गरेका थिए । विद्यार्थीहरुको मार्चपास गर्नुको साथै आ–आफ्नो प्रतिभा प्रस्फुटन गरेर कार्यक्रमलाई सन्देशमुलक बनाएका थिए । कार्यक्रममा हाजिरिजवाफ प्रतियोगिता, नाटक लगायत साँगेतिक कार्यक्रमहरु पनि आयोजना गरिएको थियो । कार्यक्रममा सहभागी विद्यालयहरुले गत बर्ष गरेको प्रगति प्रतिवेदन प्रस्तुत गर्नुको साथै आगामी योजना समेत प्रस्ताव गरेका थिए । जिल्लाबाट आएका अतिथीहरुलाई स्थानीयहरुले होमस्टेको समेत ब्यवस्था गरेका थिए । कार्यक्रममा बोल्ने वक्ताहरुले सरसफाइ र चेतना विस्तारका लागि सवैले पहल गर्नु पर्ने धारणा राखेका थिए । कार्यक्रममा बज्रवाराहीमा कार्यरत विभिन्न संघसस्थाका प्रतिनिधीहरु, विद्यार्थी, अभिभावक, शिक्षक लगायत गरी करिव १२ सय जनाको उपस्थित रहेको थियो । 

कार्यक्रममा बोल्दै आयोजक सुनौला माविका प्रधानाध्यापक रुपचन्द्र गोपालीले बज्रवाराहीमा रहेका ऐतिहासिक पर्यटकीय संम्पदाहरुको संरक्षण र स्थानीयमा जनचेतना अभिवृद्धिका लागि सवैले ध्यान दिनु पर्ने वताउनु भयो । रेडक्रसको सेवाबाट स्थानीय समेत खुसी भएको वताउँदै गोपालीले स्थानीयमा जनचेतना अभिवृद्धिका लागि पनि हातेमालो गर्नु वताउनु भयो । 

जनचेतना सहित प्रभातफेरीमा सुनौला माबिका विद्यार्थीहरु 

कार्यक्रममा रेडक्रस मकवानपुरका संयोजक कृष्ण बहादुर सापकोटा, रेडक्रस मकवानपुरका सभापति सूर्यचन्द्र न्यौपाने, सचिव लाल बहादुर थापा लगायत जिल्लामा कार्यारत विभिन्न सामाजिक संघसस्थाका प्रतिनिधीहरुको समेत सहभागिता रहेको थियो । जिल्ला रेडक्रस जुनियर युवा गोष्ठीको ३२ औं गोष्ठी गिताधर्म निमावि सुकौरामा हुने भएको छ ।