जनकल्याणलाई ४२ लाख हस्तान्तरण

सुरजकुमार भुजेल

मकवानपुर पालुङमा रहेको जनकल्याण उच्च माविमा अत्याधुनिक भवन निर्माणका लागि सहयोग प्राप्त भएको छ । सहयोगपछि व्दिालयमा अध्ययनरत एकहजार बढि विद्यार्थीले सहजै गुणस्तरीय शिक्षा लिन सक्ने भएकाछन् । नेपाल भारत आर्थिक सहयोग कार्यक्रम अन्तर्गत जनकल्याणले भवन निर्माण गर्न भारतीय महावाणिज्य दुतावास, वीरगन्जले बुधबार ४२ लाख रुपैयाको चेक हस्तान्तरण गरेको छ । हस्तान्तरित रकम कूल सहयोग रकमको १० प्रतिशत रहेको महावाणिज्य दुतावासले जनाएको छ ।

महावाणिज्यदुत आशुतोष अग्रवालले मकवानपुरका स्थानीय विकास अधिकारी भुवनप्रकाश विष्टलाई विद्यालयमा आयोजित कार्यक्रमका ४२ लाख २१ हजार रुपैयाको चेक हस्तान्तरण गरेका हुन् । गत २०७० साल बैशाख ४ गते भारतीय राजदुतावास, जिल्ला विकास समिति मकवानपुर जनकल्याण उच्च माविबीच २२ वटा कक्षा कोठा सहितको भवन निर्माण गर्न चार करोड २२ लाख रुपैयाको सम्झौता भएको थियो ।

चेक हस्तान्तरण गर्दै महावाणिज्यदुत अग्रवालले नेपालमा शान्ति र समृद्धिको वातावरण बनाउन भारत सरकारले पूर्वाधार निर्माणमा जोड दिएकाले विद्यालय भवनमा सहयोग गरेको बताए । अब आधुनिक भवनको कक्षा कोठामा बसेर विद्यार्थीहरुले भविष्यमा समाजका लागि उत्तरदायी नागरिक बन्ने सपना देख्नेमा उनले विश्वास गरे ।

कार्यक्रममा मकवानपुरका स्थानीय विकास अधिकारी भुवनप्रकाश विष्टले भवन निर्माणको लागि जिल्ला विकास समितिले टेण्डर आह्वान गरिसकेको र अब ठेकेदार छनोटको प्रक्रियामा रहेको जानकारी दिए । उनले भवन निर्माणको क्रममा गुणस्तरीय भए नभएकोबारे निगरानी गर्न स्थानीय बासीलाई आग्रह गरे । एकीकृत नेकपा माओबादीका राज्य समिति सदस्य ज्योति रायमाझीले विद्यालयको भौतिक विकाससंगै शैक्षिक गुणस्तरका लागि छलफल चलाउनु पर्ने आवश्यकता औंल्याए । जिल्ला शिक्षा अधिकारी खड्गबहादुर कमालले विद्यालय शिक्षाको राम्रो परिणामको लागि एकपटक सबैले सोच्नुपर्ने बताए ।

विद्यालयमा नयाँ भवन बनेपछि एक हजार २ सय भन्दा बढी विद्यार्थीहरुले लाभ पाउने विद्यालयका प्राचार्य सानोभाइ कार्कीले बताए । कार्यक्रममा विद्यालय व्यवस्थापक समितिका अध्यक्ष राजिब स्याङ्दानले भवन निर्माणको क्रममा समितिले विशेष चासो र निगरानी गर्ने प्रतिबद्धता व्यक्त गरे ।